Albisteak
Mitsuko Uchidaren kontzertura joateko doako autobusa izango da
— 2023-01-04Mitsuko Uchida piano jotzailea japoniarrak hilaren 13an Donostiako Kursaal Auditorioan eskainiko duen kontzertura doako autobusean joateko aukera egongo da. Izan ere, aurreko zenbait alditan bezala, “Kursaal eskura” egitasmoan parte hartuko du Zestoako Udalak. Kursaal Eskura proiektuak Kursaal Zentroak antolatzen dituen zenbait kontzertu eta ikuskizun interesa duten lagunen eskura jartzea du helburu, eta hori lortzeko, doako autobus zerbitzua eskaintzen du.
Interesdunek Kursaal Elkarguneko web orrian erosi beharko dute kontzerturako sarrera: www.kursaal.eus. Hainbat prezio daude aukeran, 11 eurotik hasi eta 62 eurora arte. Langabetuek eta 30 urtetik beherako interesdunek, sarrerak 3 euroko prezioan erosi ahal izango dituzte. Behin sarrerak erosita, autobuseko lekua erreserbatzea ezinbestekoa izango da 943 147 010 (luzapena 8) edo 688 735 652 telefonoetara deituta edo kultura@zestoa.eus helbidera idatzita. Autobusa arratsaldeko 19:00etan irtengo da, GI-631 errepideko geralekutik.
Piano jotzaile japoniarrak Mahler Chamber Orchestra izango du lagun emanaldian eta honeako izango da joko duen errepertorioa: Mozarten Pianorako 25. kontzertua, Schoenbergen 1. Ganbera Sinfonia eta Mozarten Pianorako 27. kontzertua.
Egin zaitez bazkide