Albisteak
Peru Llanosek irabazi du Uztapide bertso paper sariketa
— 2016-07-24Errallak, hil honetan, Uztapide bertso paper sariketa antolatu du. Gaur, uztailak 24, lehiaketara aurkeztu diren bertsoak abestu dituzte Laranjadi plazan. Peru Llanosek irabazi du sariketa, eta bere bertsoak kantatu ondoren, Aitor Salegik jarri dio txapela.
Erralla bertso eskolako bi ikaslek abestu dituzten bi bertsorekin hasi da saioa. Aurtengo ikasturtean berreskuratu dute haurren bertso eskola, Errallako kideek nabarmendu dutenez.
Laranjadin bertsoak kantatu ondoren, bertso bazkaria izan da Jubilatuen tabernan, Oihana Iguaranekin eta Iñaki Apalategirekin.
Errallako kideak gustura daude, jende asko aurkeztu ez bada ere, aurtengo helburua sariketa berreskuratzea izan baita. Urtetik urtera, indarra hartuko duela espero dute.
Aurtengo bertso-sorta irabazleak “Hau ez da berria” izenburua dauka, eta Peru Llanosek idatzi du. Ondorengo lerroetan daukazue irakurgai, eta jarraian, ekitaldiko argazkiak.
Doinua: Xabier Silveiraren “ETAren su-etenetik”
1. Zure begien dizdira
bilakatu da desio.
Zure irrifar “maltzurra”,
amets “gaiztoen” pasio.
Zu ezagutzea daukat
azken aldian misio,
ezustean bihurtu da
nahi gabeko obsesio,
gerturatzen saiatzen naiz
dagoenean okasio,
baina lotsa gailentzen da
mila dardar inbasio
alkohol gradu altuenak
zurekin ez du balio.
2. Parrandan ere ezina
izotz urtuan irrista
zeinen itxia daukaten
autoestima pista,
Napoleon izan nahi dut
urrutira bota bista
teknologiaz lagundu
dena zein surrealista
pikutara protokolo
izan nadi egoista
armiarmaren dohaiak
ditugu protagonista
sarean murgilduko naiz
hasi dadila konkista
3. Sare sozialen mundua
horrelaxe deritzaio
nahiz harreman sozialei
arrivederci ta aio.
Perfilean sirena du
ze arrai ta ze arraio
tutikan ez det ulertzen
baina gertura natzaio
bere laguna “klik” batez
izatea ez nun nahio
sentidurikan ez duen
lekuan ote naiz jaio?
Armiarmai hankak eta
arraiai zer falta zaio?
4. Ordenadore pantaila
eta wifia harresi
emotikonoak dira
bihurtuko kupido gezi.
Idatzi dizkiot jada
hamar-hamaika poesi
doinu, errima ta neurriz
gutxio ez zuen merezi
erantzuna hutsartea
sentitu ahal da berezi?
Irudimena landuaz
egin hainbat hipotesi
hutsartea luzatu da
orain ni noa ihesi.
5. Erantzun eza daukagu
piztu ezin leiken sua
halakoxea daukat
nere maitasun kasua
su garra ez itzaltzea
neretzako probetxua
erreta bukauko banu
galduko nuke pultsua
probau gabe ezin jakin
ze lore den pozoitsua
begiak irikitzeko
eman behar det pausua
zein ostiak esan zuen
maitasuna da itsua.
6. Istori berberak beti
amaiera bortitza,
ate guztiak itxita
galdurik al dago giltza?
Lehiotik lotsa airera
haizeak eman du hitza
astindu ditu goi ta behe
baretzeraino ekaitza
sentimendu aldakorren
parabola da bizitza
amorerik eman gabe
beroan bila gabiltza
egunero irtetzen da
berriz eguzkian printza.
Egin zaitez bazkide