Albisteak

Aste honetan erabakiko du Eusko Jaurlaritzak egoerari aurre egiteko neurri zorrotzagoak hartuko dituzten edo ez. Hala adierazi du Iñigo Urkullu lehendakariak gaur goizean Radio Euskadin egin dioten elkarrizketan. Egoera “kezkagarria” dela esan du eta horri aurre egiteko esku artean “hainbat aukera” dituztela azpimarratu du.

Asteazken edo ostegunean aztertuko dute ze neurri hartuko dituzten, egun horietako datuek erakutsiko baitute aurreko neurriek izandako eragina. Etxeko konfinamendua ez du baztertu lehendakariak: “Neurri guztiak aztertzen ari gara. Dena dela, orain halakorik iragartzen badut, alarma gisa ulertuko da, etxeko konfinamendua etorriko dela”. Herritarrei sei pertsonako taldetatik kanpo ez mugitzeko eskatu die. Bestalde, garraio publikoan ibilgailu gehiago jartzea aztertzen ari direla iragarri du.