Albisteak

Urtero legez, suaren bueltan ospatuko dute San Joan bezpera herrigunean, Iraetan eta Aizarnan. Herrigunean, iluntzeko 22:00ak aldera piztuko dute sua, plazan. Itxaropena dantza taldekoak suaren inguruan dantzan arituko dira, Idiakaitz txistulari taldearen doinuen laguntzarekin. Sua itzali ondoren, Aizpea Aristi eta Mauriziak ez du inor hil ekitaldia izango dira Laranjadin. Zestoako Udalak jakinarazi du, aurten, herriguneko plaza zaharberrituta dagoela ikusita, eta inolako kalterik ez eragiteko asmoz, aldaketa txiki batzuk egingo direla. Suaren tamaina egoera berrira egokituko dute, azkar erretzeko moduko errekina erabilita. Horrez gain, sua denbora laburragoan egongo da piztuta, 23:00ak aldera itzaliko dute.

Aizarnan, sardina erreak jango dituzte Aranburu landetxearen atarian, eta ilundutakoan sua piztuko dute. Iraetan, futbol zelaiko aparkaleku inguruan egingo dute sua, eta antolatzaileek jakinarazi dute aurreko urtekoetakoa baino txikiagoa izango dela.

Zestoako Udalaren segurtasun oharrak:

• Zestoako Udalak jarriko duen errekinaz aparte, guztiz debekatuta dago jendeak bestelako material edo trasteak botatzea su-eremura. Ohar hau sua piztu aurretik zein ondoren zorrozki bete beharko da.

• Sua piztuta dagoen bitartean, ez da gomendatzen jendea bertara hurbiltzea. Gurasoen erantzukizuna da gomendio hori betearaztea, adin txikikoen kasuan.

• Arratsaldean zehar, udaltzainak eman ditzakeen jokabide-jarraibideei kasu egitea eskatzen da eta, suaren momentuan, sua pizteaz eta jarraipena egiteaz arduratuko den Eginkizun Anitzeko langileari kasu egitea.