Albisteak

Zestoako Eromen Produkzioak taldeak jakin berri du Azpeitiko Euskal Antzerki Topaketetako ikuslegoaren saria irabazi duela. Sweeney antzezlana eskaini zuen taldeak topaketetan, azaroaren 18an.

Ostegunean izan zuten sariaren berri, Amancay Gaztañaga zuzendariak kontatu digunez. Saria harriduraz eta pozez hartu dute, “baldintza prekarioetan gabiltza lanean, eta horrelako sariak erakusten dute esfortzuak merezi duela”. Parte hartzaileen artean maila altua dagoela azaldu digu Gaztañagak, tartean baita profesionalak ere, hori dela eta, sorpresaz hartu dute berria: “ikusleak bozkatzen dute, eta ez duzu pentsatzen talde amateur bati emango diotenik bozka”. Aurrera begira lanean jarraitzeko ilusioa eta indarra eman die sariak taldeko kideei.

Saria San Tomas egunean jasoko dute Azpeitian; 600 eurokoa izango da, eta azpiegitura eta materialetan inbertituko dute, horretan dagoela beharrik handiena azaldu baitigu zuzendariak.