Albisteak

Pasa den hilaren 2an Zestoako pilotariek hasiera eman zioten Gipuzkoako Herriarteko Txapelketari, eskuzko modalitatean. Aurtengoan, hiru mailatan lehiatzen ari dira: kadete, jubenil eta nagusien mailan.

Lehenengo partidetan Lazkaoren aurka aritu ziren, eta zestoarrek hiru partidatatik bi irabazi zituzten. Kadete mailan, Urrestila eta Zabala 22-6ko emaitzarekin gailendu ziren. Jubenilen mailan, Azkue eta Uriak ez zieten aukerarik eman aurkariei, eta 22-1 irabazi zuten. Nagusien mailan, aldiz, Odriozola eta Alonsok osatutako bikoteak ez zuen zorterik izan, eta 22-11 galdu zuten.

Kanporaketaren itzulerako partidak bihar, ostiralez, izango dira, Lazkaoko Joxemiel Barandiaran kiroldegian. Arratsaldeko 19:15ean hasiko da jardunaldia kadeteen partiduarekin; ondoren, jubenilek jokatuko dute, eta azkenik, nagusien norgehiagoka izango da.