Urtero bezala, Errigorak abian du Eskutik Eskura kanpaina, aurten “Beste modura, denona da onura” lelopean. Lelo horrekin ditugun kontsumo ohituretan jarri nahi izan dute azpimarra, izan ere, egungo elikadura sistema merkatuaren menpe dago, baina kontsumitzaileon erabakiek horri buelta ematen lagun dezakete.

Errigoraren kanpaina honekin bat eginda, gutxi batzuen irabaziak elikatu ordez, denon mesedera jokatuko duen alternatiba bat elikatuko dugu, elikadura burujabetza, hain zuzen ere. Nafarroa erdi eta hegoaldeko produktuak jatorrizko prezioan eskuratzea ahalbidetzen digu, betiere, ekoizleei prezio duina ordainduta. Bide batez, despentsa urte osorako eta kalitatezko elikagaiz betetzeko modua dugu.