Albisteak

Bizikleta, patin eta patineteekin elkartu ziren haur eta gaztetxo ugari atzo, urriak 30, Zestoako pump trackean. Oreinbikek gidatuta, instalazioari zukua ateratzeko gakoak eta segurtasunez ibiltzeko neurriak ezagutu zituzten.

Zirkuituaren gorabeherak eta bihurguneak aprobetxatzen ikasteko aukera izan zuten parte hartzaileek. Oreinbikeren azalpenen arabera, besoen eta hanken mugimenduen bidez inertzia eta oreka mantentzen ikastea da gakoa; teknika hobetu ahala, pistak eskaintzen dituen aukerak gehiago aprobetxa daitezke.

Izan ere, adin, maila eta modalitate askotako erabiltzaileen topagune gisa ulertzen ditu Oreinbikek pump trackak: hasi berriek zein esperientzia handiagoa dutenek nork bere neurrira gozatzeko guneak. Atzoko saioak ere kirola eta ikaskuntza uztartu zituen, gaztetxoei herriko instalazioaz segurtasunez gozatzeko baliabideak eskainiz.