Albisteak

Iazko azaroan datorren urtean hamar urte beteko dituen webgunea erori egin zitzaigun. Altzatzea lortu genuen baina justu-justuan daukagu eta ez dago beste aukerarik, berria egin behar dugu!

Aldizkaria maitea dugu, baina webguneak eguneroko informazioa azkar zabaltzeko aukera paregabea ematen digu, eta derrigorrezko hanka bihurtu da Danbolin proiektuan.

Auzoen presentzia indartuko duen webgune berria

Webgune berria egiterako orduan, koloreak eta diseinua eguneratuko ditugu, noski. Atari praktiko eta bisualagoa egiten saiatuko gara. Bada, ordea, guretzat bereziki garrantzitsua den gauza bat: auzoen presentzia indartzea.

Askok jakingo duzuen moduan, eskualdeko proiektuan momentuz, behintzat, ez sartzeko erabakia hartu genuen duela urte batzuk, handien artean txikiarekin gertatuko zenak kezkatuta, besteak beste. Arrazoi horri tiraka, gurean txiki sentitzen zirenekin, auzoekin alegia, zerbait estrategikoa egiteko erabaki irmoa hartu genuen. Bide horretan auzo-erredakzioak sortu ziren. Arroabean, Arroagoian, Aizarnan eta Iraetako taldeetan 25 lagunetik gora ditugu bateko eta besteko berri ematen, zuzenean gauzak iragartzen, proposatzen… (bide batez esan, talde hauek irekiak direla eta norbaitek sartu nahiko balu… jakinarazi!). Orain beste pausu bat eman nahi dugu eta auzo bakoitzak bere txokoa izango du webgune berrian.

Dirua biltzeko azoka

Danbolin irabazi asmorik gabeko elkartea da, eta ez ditugu webgune berria egiteko behar diren 5.000 euroak eskura. Horregatik, bigarren eskuko azoka berezi bat antolatzea erabaki dugu. Hori bai, aurrez garbi esan nahi dugu helburua dirua biltzea dela.

Zubimusuko Udaleko brigadako lokalean egingo dugu materialen bilketa. Dirua lortzeko moduko gauzak nahi ditugu, “hau Danbolini emango diot ea honekin diru pixka bat lortzen duten” esateko modukoak; altzari txikiak, dekorazio objektuak, kirola egitekoak, arropa eta osagaiak…

Ez da faltako jai girorik

Ekainaren 22an izango da egun osoko azoka, eta tartean musika eta koktel dastaketa ere antolatu ditugu.

Koktel dastaketarako plastikozko edalontziak erabili nahi ez eta kristalezko edalontziak eskatzeko Whatsapp mezua zabaldu genuen eta berehala inguratu ditugu 50 kopa. Ederra da herriaren erantzuna ikustea. Beti dago norbait laguntzeko gogoz eta oraingoan ere argi dugu lortuko dugula webgune berria egiteko behar dugun guztia.

Jasoketa Zestoan, Brigadaren Zubimusuko lokalean:
👉 Maiatzak 31, ostirala (17:00-19:30)
👉 Ekainak 1, larunbata (10:00-13:00)
👉 Ekainak 7, ostirala (17:00-19:30)
👉 Ekainak 8, larunbata (10:00-13:00)

Jasoketa auzoetan
👉Arroabea: maiatzak 29 (18:00-18:30)
👉Aizarna: maiatzak 30 (18:00-18:30)
👉Arroagoia: maiatzak 30 (19:00-19:30)
👉Iraeta: maiatzak 30 (19:30-20:00)