Albisteak

Udalbatza aretoko banku historikoen zaharberritze lanak ezagutzeko aukera izango da bihar

Bihar, azaroak 19, 11:30ean, Zestoako udalbatza aretoan egiten ari diren zaharberritze lanen inguruko azalpenak emango dituzte. XVIII. mendeko bankuak Gipuzkoako Batzar Nagusien historiaren lekuko dira.

Zestoako Udalak eta Gordailua Gipuzkoako Ondare Bildumen Zentroak antolatuta, udalbatza aretoko banku historikoen zaharberritze lanak gertutik ezagutzeko aukera izango da bihar, azaroak 19. Hitzordua 11:30ean izango da, udaletxean, eta Jon Egidazuk, Ereiten Kultur Zerbitzuak enpresako kideak, euskaraz emango ditu azalpenak. Ondoren, Carmen Martinek, Taller CM Restauración enpresakoak, gaztelaniaz eskainiko ditu.

Joan den irailean, Gipuzkoako Foru Aldundiak bankuen inguruan egindako ikerketaren emaitzak aurkeztu zituen Zestoan. Azterketak agerian utzi zuen bankuak gutxienez XVIII. mendekoak direla eta Gipuzkoako Batzar Nagusien bilkura ibiltarien lekukotza gordetzen duen ezaugarri horietako multzo bakarra dela. Gainera, historian zehar hainbat pintura-geruza izan dituztela egiaztatu zuten, eta zaharberritze lanen bidez antzinako polikromiaren lagin bat agerian uztea aurreikusi zuten.

Ikerketa haren jarraipena dira orain egiten ari diren zaharberritze lanak. Helburua bankuen kontserbazioa bermatzea eta haien historia hobeto ezagutaraztea da. Lanek irauten duten bitartean, udalbatza aretoa zabalik egongo da, herritarrek prozesua bertatik bertara ikusteko aukera izan dezaten.




Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 36 euroko diru ekarpena egiten duten 400 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide. Egin zaitez bazkide

Egin zaitez bazkide