Albisteak

Urriaren 17a ate joka da, eta Zestoako Mugimendu Feminista azken prestaketa lanetan ari da Elkartasuna plazara jaialdirako. Jaialdiak gero eta atxikimendu gehiago jaso ditu, eta herritar ugari ari dira antolakuntza lanetan laguntzen. Musikari gehiago ere batu dira egitaraura, eta azken kartelean haurrentzako txokoa iragarri dute.

Ekarpen ekonomikoa egunean bertan egin daiteke edo elkartasun bonoak erosiz

Herri bazkarirako txartelak erosteko epea astelehenean amaitu zen, baina kontzertuetarako sarrerak jaialdiaren egunera arte eskuratu ahal izango dira. Sei herritarrei babesa emateko kamisetak eta poltsak ere jarri dituzte salgai, baita 10, 20 eta 50 euroko elkartasun bonoak ere. Azken horiek honako leku hauetan eskura daitezke: Zestoan, Portale eta Ogi Berri tabernetan; Azpeitian, Orkatz eta Niza tabernetan; Zumaian, Emakumeon* Etxean; eta Zarautzen, Arrano tabernan.

Elkartasun jaialdian auzolanean

Egunean bertan antolakuntza lanetan lagundu nahi dutenek zestoakomugimendufeminista@gmail.com helbidera idatz dezakete.

Eguraldiak ere ez du festa zapuztuko eta  euria egiten badu, bazkaria lekuz aldatuko dute, jaialdiak aurrera egin dezan. Izan ere, sei zestoarren absoluzioa ospatzeko eta urte hauetan jasotako babesa eskertzeko eguna izango da larunbatekoa, baita prozesu judizialak eragindako 30.000 eurotik gorako gastuei elkarrekin aurre egiten laguntzekoa ere.

Egitarau osoa

+ 12:00 Ongietorria

+ 12:00- 14:00 haurrentzako txokoa

+ 12:15 Bertso saioa
Onintza Enbeita eta Uxue Alberdi.

+ 13:00 Poteo musikatua
Le Big Gibel taldearekin.

+ 14:30 Herri bazkaria
Bazkalostean poesia errezitaldia.

+ 17:00etatik aurrera kontzertuak
Rodeo eta Familia, Aizpea, Ke Lepo, Sara Zozaya, Ines Osinaga eta Bad Sound Sister.

Sarrerak

+ Kontzertuetarako txartela – 18 euro; prekarioentzat, 15 euro.

Sarrerak Zestoan, Portalen eta Ogiberrin; Zumaian, Emakumeon* Etxean; Azpeitian, Orkatzen eta Nizan; eta Zarautzen, Arranon daude salgai.