Albisteak

333 puntu lortu ditu lehen sailkatu den Haizea Aranak eta aita, zaintzen duten guztiak eta lagun bollerak izan ditu gogoan bere azken agurrean.

Gipuzkoako Bertsolari Txapelketako sailkapen fasea da Gipuzkoa Bertsotan. Aurten, gainera, urteurren garrantzitsu batek are garrantzi handiagoa emango dio udaberriko faseari; 50 urte dira Gipuzkoako lehen bertso-eskola sortu zela.

Eskoriatzan hasita, 32 herritan izango dira saioak bi fasetan banatuta. Lehen fasean izena eman duten 74 bertsolariek kantatuko dute, eta horietatik 48 pasako dira bigarren itzulira. Udazkenean izaten den Gipuzkoako Bertsolari Txapelketarako txartela, aldiz, 48 horietatik 34k lortuko dute.

Apirilaren 25ean, atzo, hasi zen Eskoriatzan Gipuzkoa Bertsotan, eta sailkapen faseko kanporaketa bat izan da gaur Zestoako kultur etxean. Eneko Araiztegi, Eneko Beretxinaga, Haizea Arana, Oihana Arana, Julen Zulaika eta Amets Aizpurua bertsolariek hartu dute parte, Haritz Alberdi gai jartzailearen agindutara.

Jarraian, gaurko puntuazioa:

333 punturekin, lehen sailkatua, Haizea Arana

329,5 punturekin, Eneko Araiztegi

319,5 punturekin, Oihana Arana

316,5 punturekin, Julen Zulaika

305 punturekin, Eneko Beretxinaga

296 punturekin, Amets Aizpurua

Hauxe Haizea Aranak agurrean botatako bertsoa

Oihana gure aitatxo harro

legoke oso gainera,

zaintzen nauzuen guzti horientzat

ezin dut hitzik atera,

sarri bakarrik ezin denean

posible baita batera,

baina bertsotan ibili gabe

nola bagaren bollera,

azkenerako egunak hartu

du ospakizun tankera

benga amigas, berandu goaz,

goazen Leizan ospatzera