Albisteak

Hilaren 7an, igandea, egingo du Itxaropena dantza taldeak ikasturte amaierako ohiko jaialdia. 18:30ean egingo dute hitzordua dantza taldekoek Laranjadi plazan, baina eguraldia lagun ez badute, kiroldegiko frontoian lekualdatuko dute.

Kaskarotak dantzan izena jarri diote Itxaropenakoek aurtengo ikasturte amaierarako prestatu duten ikuskizunari. Izan ere, Lapurdiko kaskaroten dantza, doinu eta kantuekin osatu dute emanaldia. Itxaropena dantza taldeko 90 dantzari inguru ariko dira plazan, 6 urtetik 60 urtera bitartekoak, belaunaldi ezberdinak ikuskizun berean elkartuz. Haiekin batera ariko dira Garikoitz Mendizabal, Xabi Zabala, Jon Mendizabal, Gorka Regil, Beñat Etxabe eta Joseba Regil musikariak.

Inauteri garaian Lapurdin etxez etxe eskean ibiltzen diren gazte taldeak dira kaskarotak. Barne festa izan ohi da gehienetan; askotan etxe barruetan orduak igarotzen dituzte jan-edanean, kantuan eta festan. Itxaropenakoek aurreratu dutenez, “martxen doinura eta erritmora mugitu ohi dira alde batetik bestera, eta geldialdietan hainbat dantza egiten dituzte; besteak beste, xinple, marmutx, makila-txiki, makila-handi, dantza-jauziak, fandangoa…”. Halaber, kaskarotetako hainbat pertsonaia ere izango dira emanaldian: “Ponpier eta Kotilungorri izeneko pertsonaiak ere taldearen parte dira, baita banderaria, jaun-andereak eta beste hainbat ere. Eta kontuz! Zenbait leku eta unetan hartza ere agertu izan da”.