Albisteak

Gaur, abuztuak 12, asteetan mintzagai izan den ezohiko fenomeno astronomikoa izango da. Mende bat baino gehiagoan Iberiar penintsulatik ikusi ahal izango den lehen eguzki-eklipse totala izango da, eta Zestoan ere Eguzkia ia erabat estaliko du Ilargiak. Fenomenoaren unerik gorena 20:27ak aldera izango da.

Gaurkoaren berezitasuna da eklipse totala izango dela Iberiar penintsulako hainbat lekutan; halakorik ez da ikusi penintsulan 1912az geroztik. Zestoa totalitatearen zerrendaren mugatik oso gertu geratuko da. Eklipsea 19:31ak aldera hasiko da eta unerik gorena 20:27ak inguruan iritsiko da, Eguzkiaren diskoa ia erabat estalita dagoenean. Zestoan, hala ere, eklipsea partziala izango da.

Une horretan Eguzkia oso baxu egongo da, 7 eta 8 gradu inguruko altueran eta mendebal-ipar-mendebaldera. Zestoako herrigunean, beraz, mendiz inguratuta dagoenez, ezingo da eklipsea zuzenean ikusi. Hala ere, Eguzkia ia erabat estaliko denez, argitasunaren beherakada nabaritu egingo da herrian.

Fenomenoa ikusi nahi duenak mendebal-ipar-mendebaldera horizonte zabala eta oztoporik gabea duen toki bat bilatu beharko du. Eta ezinbestekoa izango da eklipseetarako homologatutako betaurrekoak erabiltzea; Eguzkiari zuzenean begiratzeak begietan kalte larriak eragin ditzake.

Eklipsearen inguruko informazio ofizial eta zabala hurrengo webgunean aurkitzen da: eklipsea.euskadi.eus/