Albisteak

Koronabirusak herriko saltokiei ateak irekita mantentzeko zailtasun ugari ekarri dizkie eta ezinbestekoa dute herritarron laguntza egunerokotasunari aurre egiten jarraitu ahal izateko. Hori dela eta, Zestoan Merkatari elkarteak ‘Zestoan Behin’ galdera-erantzun jokoa antolatu du bertako komertzioak gehiago ezagutu eta herritarren fideltasuna saritzeko. 

Partida bihar, uztailak 30, osteguna, jokatuko da gaueko 21:00etan hasita eta nahi duen orok hartu dezake parte. Galdera-erantzunen bitartez, Zestoan Merkatari elkarteari lotutako 15 galdera erantzun beharko dituzte parte hartzaileek eta irabazleak herriko dendetan gastatzeko 50€-ko bonoa eskuratuko du. 

Nola hartu dezaket parte?

1. Mugikor, ordenagailu edo tabletean webgune honetan klik egin eta datozen orduetan jakitera emango den kodea sartu beharko du erabiltzaileak. 
2. Webguneak izen bat eskatuko dio erabiltzaileari eta benetako izen-abizenak jarri beharko dira bertan. 
3. Gaueko 21:00etan emango zaio hasiera jokoari eta Zestoan Merkatari elkarteari lotutako 15 galdera erantzun beharko dira. 
4. Galdera guztiak erantzun ostean, parte-hartzaile bakoitzari sailkapen orokorra ageriko zaio eta lortu duen postua ikusi ahal izango du.

Adi!: Antolatzaileek 21:00etan emango diote hasiera partidari eta aldi berean jokatuko da. Beraz, sartu kodea eta erabiltzaile-izena 21:00ak baino lehen.

Datozen orduetan jarraibide gehiagoren berri emango da Danbolineko webgune zein sare sozialetan.