Albisteak

Abuztuaren 14an hasi eta 17ra bitartean ospatuko dituzte aurtengo Amabirjinak Aizarnan. Lau eguneko egitarauan adin guztientzako ekintzak izango dira: txupinazoa, herri afaria, pilota partidak, herri kirolak, umeentzako jarduerak eta gaueko musika emanaldiak, besteak beste.

Jaiei hasiera ostiralean emango diete, 18:00etako txupinazoarekin. Ondoren, herriko gazteek karropoteoa egingo dute, eta gauean herri afaria, Obaneuke taldearen emanaldia eta DJ Patx izango dira.

Larunbatean, Meza Nagusiaren ondoren jubilatuen hamaiketakoa egingo dute, eta eguerdian pilota partidak jokatuko dira. Arratsaldean, Aizarna eta Aizarnazabalen arteko herri kirolen lehia izango da, Bost Axolaren saioarekin jarraitzeko. Eguna bingoarekin eta DJaren musikarekin amaituko da.

Igandean, oilasko biltzaileak izango dira protagonista. Goizean oilasko bilketari ekingo diote, eguerdian umeen krosa egingo da, eta bazkalaurretik oilasko biltzaileen aurreskua eskainiko dute plazan. Ondoren paellada izango da, eta gauean Laket taldeak eta DJ Costmixek jarriko diote amaiera egunari.

Azken egunean, astelehenean, haurrek izango dute protagonismoa. Goizean Kalakaren zurezko plaza-jokoak izango dira, ondoren umeen bazkaria egingo dute, arratsaldean ginkana antolatu dute eta jaiei amaiera emateko DJ Ostoren saioa izango da.