Albisteak

Eskola Haziak egitasmoko laugarren saioa egingo dute igandean Amillubin. Goizean zehar auzolana, ikaskuntza eta elkartrukea uztartuko dituzte, eta jardunaldia interesa duen edonorentzat izango da irekia.

Egitaraua 9:00etan hasiko da auzolanarekin; horretarako, eskularruak eramatea gomendatu dute antolatzaileek. Ondoren, 11:00etan, kafea hartu eta solaserako tartea izango dute parte-hartzaileek. 11:30ean hasiko da eguneko saio nagusia. Bertan, Elikagunearen funtzionamendua ezagutzeko aukera izango dute, eta, aldi berean, ekonomia agroekologiko eta feministaren inguruko gakoak eta hausnarketak partekatuko dituzte. Mirene Begiristain eta Ioritz Aizpuru izango dira hizlariak.

Bestalde, antolatzaileek jakinarazi dutenez, Amillubiren inguruan prestatzen ari diren dokumental laburraren grabazioa ere egingo dute jardunaldian. Garro anaiak bertan izango dira irudiak jasotzen.