Albisteak

Igande honetan, apirilak 19an, Eskola Haziak egitasmoaren bigarren saioa egingo dute Amillubin. Agroekologiaren eta nekazaritza jasangarriaren inguruan ikasi nahi duen edonorentzat irekia den dinamika honek, auzolana eta formakuntza uztartzen ditu, esperientziak partekatzeko eta sareak ehuntzeko helburuarekin.

Bigarren saio honetan, 9:00etan ekingo diote auzolanari, eta 11:30ean kafe tartea egingo dute. Ondoren, 12:00etan, “Gure baratzetan burujabe” tailerra eskainiko dute Biolur-Amillubiko kideek, baratza martxan jartzeko oinarriei buruzko azalpen eta praktika partekatuarekin. Antolatzaileek adierazi dute jakintza eta praktikak elkarbanatzeko gune irekia izango dela, mota guztietako baratzentzat baliagarria.

Egitasmoaren helburuen artean daude nekazari txikiak eta elikadura-sistema eraldatzen ari diren proiektuak indartzea, ikuspegi feminista, intersekzional eta kolektiboa lantzea, eta Gipuzkoako mugimendu agroekologikoaren barruan agenda komun bat ehuntzea. Saioetan, besteak beste, ekonomia sozial eta eraldatzailea, ekofeminismoa, intersekzionalitatea, ekoizpen eta merkaturatze kolektiboa eta bioeraikuntza landuko dituzte.

Parte hartu nahi dutenek izena eman dezakete info@amillubi.eus helbidera idatzita, eta antolatzaileek gogorarazi dute lanerako eskularruak eramatea komeni dela.

Hurrengo saioak:

• Ekainak 14 — Bioeraikuntza
  Oinarriak eta praktika, 1. saioa
• Uztailak 12 — Merkaturatze agroekologikoa
  Salmenta duinerako bideak — Biolur
• Irailak 13 — Bioeraikuntza
  Oinarriak eta praktika, 2. saioa
• Urriak 18 — Pribilegio txuria agerian
  Ubuntu credit proyect — Nontokozo
• Azaroak 15 — Ekonomia sozial eraldatzailea
  Eredu kooperatibo eraldatzaileak landa gunean — Olatukoop / Ekintzakoop